akram.babymind
May 20, 2026, 2:22 PM
الكاتب الحقيقي ما كيبداش الكتابة حيتاش "ملهم" ولا لباغي يبان متقف بحال الي كيقراو. غالبا كيبدا حيتاش وسطو تهرس بشي طريقة. كاين واحد المرحلة كيوصل ليها الانسان: ماكيبقاش يهتم المظاهر، بالمجاملات، وحتى بالناس شي مرات. كيولي كيشوف العالم بلا الفيلترات الي كيعيشو بيها اللخرين. وهنا كتبدا القسوة. دوستويفسكي ماكانش كيكتب من الراحة، كان كيكتب من إنسان شاف الإعدام بعينيه، عرف الفقر، الإدمان، المرض، والانهيار النفسي. وهادشي كيبان فشخصياتي الي كتحسها مخلوعة من الداخل، كتهضر مع الله والشيطان فنفس اللحظة. وكافكا؟ راجل كان عايش اغتراب كيخلع. حاس براسو غريب حتى وسط عائلتو وكسدتو وخدمتو. داكشي علاش كتاباتو كلها فيها إحساس الإنسان لي ولا مجرد كائن مفرتت وسط عالم بلا معنى. هاد النوع ديال الكتاب ماكيكتبوش باش يهربو من المعاناة، انما هوما أصلا ما بقالهم حتى شي حاجة خرى يديروها بهاد المعاناة. الكتابة كتولي عملية نزيف. هادشي علاش كيبان الكاتب مرهق، قاسي، معزول، ولا حتى مدمر ذاتيا. حيت هو شخص دار مواجهة مباشرة مع الحياة بلا تخدير. شاف التناقض، العبث، النفاق، هشاشة البشر.. وبقا واعي بيهم كتر من اللازم. الناس الي كيقراو ليهم كيشوفو "أدب عظيم" . أما هوما، فكانو غير كيحاولو ماينهاروش.